ఆంధ్రా పల్స్ – అమరావతి: రాష్ట్రంలో గ్రీన్ ఎనర్జీ అభివృద్ధికి ప్రభుత్వం వేగంగా చర్యలు తీసుకుంటోంది. 18 గిగావాట్ల పునరుత్పాదక విద్యుత్‌ను ప్రధాన గ్రిడ్‌కు అనుసంధానించేందుకు గ్రీన్ ఎనర్జీ కారిడార్-3 కింద సుమారు రూ.22 వేల కోట్ల ప్రణాళిక సిద్ధమైంది.
శుక్రవారం సచివాలయంలో విద్యుత్ శాఖపై సమీక్ష నిర్వహించిన ముఖ్యమంత్రి చంద్రబాబు నాయుడు, ట్రాన్స్‌మిషన్ నెట్‌వర్క్ విస్తరణపై అధికారులతో చర్చించారు. ఈ ప్రాజెక్టులో భాగంగా 2,261 కిలోమీటర్ల ట్రాన్స్‌మిషన్ లైన్లు, 9,500 మెగావాట్ల సామర్థ్యంతో ఐదు పూలింగ్ స్టేషన్లు ఏర్పాటు చేయనున్నారు. ముదిగుబ్బ, తలుపుల, రామాయపట్నం, పోరుమామిళ్ల, కొప్పాక ప్రాంతాలు ఇందుకు ఎంపికయ్యాయి.
మొత్తం 18 గిగావాట్లలో 11 గిగావాట్లు సోలార్ ద్వారా, 7 గిగావాట్లు పంప్డ్ స్టోరేజ్ ప్రాజెక్టుల ద్వారా ఉత్పత్తి కానున్నాయి. భవిష్యత్తులో డేటా సెంటర్లకు అవసరమైన విద్యుత్ సరఫరాకు ఈ కారిడార్ కీలకమని సీఎం పేర్కొన్నారు.
సోలార్ కార్యక్రమాలకు వేగం
రాష్ట్రంలో ప్రభుత్వ భవనాలపై 200 మెగావాట్ల సామర్థ్యంతో సోలార్ ప్యానెల్స్ ఏర్పాటు చేపట్టినట్లు అధికారులు తెలిపారు. నెట్ మీటరింగ్, రెస్కో మోడల్ ద్వారా అమలు చేస్తున్నారు. పైలట్ ప్రాజెక్టుగా చిత్తూరులో 78 గురుకులాలు ఎంపికయ్యాయి.
నెట్ జీరో లక్ష్యంతో 2,898 హాస్టళ్లు, పాఠశాలల్లో సోలారైజేషన్ చేపడుతున్నారు. ప్రభుత్వ కార్యాలయాల్లో సోలార్ వినియోగం పెంచాలని సీఎం ఆదేశించారు.
పీఎం సూర్యఘర్ అమలు వేగవంతం
పీఎం సూర్యఘర్ పథకంలో రాష్ట్రం నాలుగో స్థానంలో ఉందని అధికారులు తెలిపారు. అగ్రస్థానానికి చేరేందుకు చర్యలు తీసుకోవాలని సీఎం సూచించారు. ఎస్సీ, ఎస్టీ వర్గాల 1.35 లక్షల ఇళ్లకు సోలార్ అమరికలు పూర్తయ్యాయని, మిగిలినవి ఆగస్టు నాటికి పూర్తి చేయాలని ఆదేశించారు.
బీసీలకు రూ.20 వేల సబ్సిడీతో 10 లక్షల ఇళ్లలో సోలార్ ప్యానెల్స్ ఏర్పాటు లక్ష్యంగా పెట్టుకున్నారు.
ఈవీ ఛార్జింగ్, డిజిటల్ గ్రిడ్‌పై దృష్టి
రాష్ట్రవ్యాప్తంగా 131 ప్రాంతాల్లో 577 ఈవీ ఛార్జింగ్ స్టేషన్ల ఏర్పాటుకు చర్యలు ప్రారంభమయ్యాయి. విద్యుత్ నష్టాలను తగ్గించేందుకు ఏఐ ఆధారిత విధానాలు అమలు చేస్తున్నారు. దేశంలో తొలిసారిగా డిజిటల్ ట్విన్ గ్రిడ్ నిర్మాణం చేపడుతున్నట్లు అధికారులు వెల్లడించారు.
జూన్ నుంచి నవంబర్ 2026 మధ్య గరిష్ట డిమాండ్ 12,226 మెగావాట్లకు చేరే అవకాశం ఉందని అంచనా. మే 21న 15,016 మెగావాట్ల అత్యధిక డిమాండ్ నమోదైంది.
సీబీజీ ప్లాంట్లకు ప్రోత్సాహం
రైతులకు ఆదాయం పెంచే సీబీజీ ప్లాంట్ల ఏర్పాటును వేగవంతం చేయాలని సీఎం ఆదేశించారు.
వరల్డ్ ఎకనమిక్ ఫోరం బృందంతో చర్చలు
వరల్డ్ ఎకనమిక్ ఫోరం ప్రతినిధులతో సీఎం సమావేశమయ్యారు. గ్రీన్ ఎనర్జీ, సైబర్ సెక్యూరిటీ, డిజిటల్ ట్రాన్స్‌ఫర్మేషన్ రంగాల్లో ఏపీని ముందుకు తీసుకెళ్లాలని సూచించారు. విశాఖ డేటా సెంటర్ కారిడార్, గ్రీన్ హైడ్రోజన్ ప్రాజెక్టులను C4IRతో అనుసంధానం చేయాలని ఆదేశించారు.